U3F1ZWV6ZTEwNjczMjMyMTc3X0FjdGl2YXRpb24xMjA5MTI5OTc0NDk=
recent
أخبار ساخنة

عندك طموبيل ، أشناهوما حقوقك فحالة درتي كصيدة


نصائح نبيل عضو روجوليست  لأصحاب السيارات اللي كايصوكو 

عندك طومبيل ها اش خاصك تعرف


#درت_كسيدة


بما انني انا هو بات الكسايد بمعدل 4 تال 6 فالعام غادي نهضر على شنو خاص يدار وحتى القوالب لي كيديرهم شي وحدين !!

كانت عندك سيارة ضروري بطبيعة الحال من لاسيرونس ؛ لا صيرونص فيها 3 الانواع كبار :

1 تأمين الحماية المدنية : هدا هو الرخيص فيهم وكتأمن على جوج حوايج :

أ : لا كنتي ماشي فوتيف يعني ضربك واحد من اللور ( صفي نيتك ) ولا ضربك واحد حارق فوروج ولا عندو سطوب ولا كان على ليسر ديالك ... فهاد الحالة بهاد لاصيرونص العادية كتعوضك على الخسائر المادية لي لحقات بالسيارة.

ب : في حالة كانو خسائر بشرية ( يعني تجرحتي ولا تقصحتي ولا تهرستي ولا متتي ولا مات شي واحد راكب معاك ) لاصيرونص كتعوضك حسب درجة الخطورة والتعويض هنا كيكون بالملايين )

الفرق فقط في المدة ديال التعويض والاجراءات : فا فحالة كانو في خسائر مادية عند الطرفين لي تسببو فالحادث , كيجي كونسطاطور ديال لاسيرونس كيعمر ليكم كوسطا وكتمشي تدفعها لاصيرونص ديالك وكيقيمو لك الخسائر وحتى هما كيحطوك فشي 3 الاختيارات :

الاختيار الاول : اتعطيهم الطوموبيل يدخلوها للكاراج ديال لاصيرونص حتى تصاوب وترجع تجيبها ( وفهادي مننصحكش حيت على بارشوك تقدر تبقى تسنى شهر )

الاختيار الثاني : اتمشي تصاوبها وتخسر فلوس من جيبك ومن بعد كتجيب ليهم Facture وكيعوضوك على شحال خسرتي . وهنا كيكونو القوالب بحيث نتا الخسائر كاملة كيكونو ايطلعو عليك ب 2000 درهم كتعطيهم Devis فيه 14000 درهم باش تصلح ، وهما كيعاودو يديرو حسابهم وكيعطيوك فاللخر شي 9000 درهم مثلا وكيشيط لك الصرف وهادسي كياخد من 15 يوم تال شهر ولا كثر حسب السرعة ديالك فالاصلاح والادلاء بالفاكتورة والدوفي .

الاختيار الثالت والرائع عند سهام : كتدير كسيدة الصباح كتمشي لواحد الستون سميتو شيك اوطو كتدخل للطوموبيل كيديرو تقييم ديلهم الخسائر وكيعطيوك شيك فالعشية وغالبا كيكون التريبل ديال الثمن باش غتصلح فالواقع .

نكملو انواع التأمينات دابا :

2 : التأمين ديال Damage et collision وهدا كيغني ان لاصيرونص اتعوضك كنتي فوتيف ولا ماشي فوتيف الفرق فقط فأنك لا كنتي فوتيف اتخلص 20٪ من الثمن لي خاصني عليه لاصيرونص النهار اللول ( يعني لا قطعتين لاصيرونص ب 5000 درهم ودرتي حادثة من بعد ونتا فوتيف ايزيدو عليك 1000 درهم ديال البيناليتي وهادشي كينطابق حتى على لاصيرونص اللولة لي هضرنا عليها الفوق . لا كنتي ماشي فوتيف مكتخلص تا حاجة )

3. : تو ريسك وهي لي مزيانة ولكن غالية ( زيد الما زيد الضقيق ) هي انك تكون فوتيف ولا ماشي فوتيف غادي تتعوض على الخسائر كامل، اتقولو لي شنو الفرق بينها وبين التأمين رقم 2 , الفرق هو انك تقدر تنعس فالليل الصباح تلقى للطوموبيل مضروبة ... هنا مكتحتاجش تلقى الطرف لي ضربك ، كتديها لاصيرونص كيعوضوك على الضربة العكس ديال Damage لي كيخص ضروري الطرف الثاني باش تتعوض .

فهاد الانواع كاملين كتقدر تزيد des options مثلا اتقطع العادية رقم 1 وتزيد التأمين على الزاج لا لقيتي شي مجهول هرسو ولا على الحريق ولا على السرقة وهاد لي زوبسبون زيد الما زيد الدقيق كلما زدتي حاجة كتخلص عليها اكثر .

نصائح عامة :

1 دير اخويا كاميرا فالطوموبيل كتحميك من التريكة لي كيسمسرو فالتأمينات .

2 ضربتي شي واحد ونتا فوتيف ضرب حسابك ... شوف الضربة لي عندو لا كان يقبل نتفاهم معاه بشي ثمن لي قل من داكشي لي اتزيد عليك لاصيرونص طحن وقدي معاه ... مثلا نتا كتخلص 5000 درهم اتزيد عليك لاصيرونص 1000 درهم وهو عندو غير قمشة خاصها شي 400 درهم ... دونك عطيها ليه ودوز حيد حسن من ألف درهم ... هادشي لا كانت عندك اصيرونص عادية ... اما لا كانت عندك Damage ولا tout risque قيد معاه وزيد قاد لراسك الضربة فالطوموبيل باش حتى نتا تتعوض .

3. ضربتي شي واحد وتقصح ولا شي حاجة ... وبان لك بلي كيمثل حاول تسلك معاه على اساس تديرو كوسطا عادية ... حيت لا بقا كيمثل عليك اتضطر تعيط البوليس هما لي يديرو الكوسطا وفهاد الحالة كياخدو لك الوراق ديال للطوموبيل وكتبقى مجرجر وهو ولد الجد غير كيمثل ... ولكن لا بان لك بلي بصح يقدر يكون تقصح ديرو خوك ولا باك ومتغمقش عليه خليه يتعوض .
مشاكل صحاب الماتر مع الطوموبيلات


4 فاش تكون صايك ديما رد بالك مع الماطر اكثر ... حيت المطور ديما لا ضربتيه عول على أنه ايكونو عندو خسائر بدنية وغادي تتجرجر معاه ... وحتى مالين الماطر عارفين بعاد البلان داكشي لاش غير كتخلعو كينعس لك فالارض حيت عارفك مغتبغيش تتجرجر واتبدا تفكر تساويها معاه بفلوس ... ولا تنازل لك دير عليه الشهود ولا دير معاه شي ورقة ديال التنازل حيت تقدر غير تمشي ويتنادم معاه الحال ويدير بيك شكاية بلي ضربتيه وهربتي وهادئة فيها تجرجيرة سانك ميل سينكونط



الاسمبريد إلكترونيرسالة