U3F1ZWV6ZTEwNjczMjMyMTc3X0FjdGl2YXRpb24xMjA5MTI5OTc0NDk=
recent
أخبار ساخنة

نهار مشيت لكازا، قصص مغربية

قصص مغربية / نهارمشيت لكازا 


فواحد النهار فلافاك مراكش، الأساتذة دياولنا اللي كايدرسونا الفلسفة، قتارحوا عنا اقتراح، شكون اللي بغا يحضر "لليوم العالمي للفلسفة" فالدار البيضاء. واللي كايدار كل سنة فالمعهد الفرنسي فكازا. بعض الطلبة عشراني نسقوا مع بعض يحضروا لهاد الأمسية الدولية الكبيرة، وقتارحوا عليا نمشي معاهم.
كنت باغي نحظر فالحقيقة، منها نيت نكتشف هاد المدينة ونشوفو هاد كازا نيgرا كيف دايرة، لكن بحكم كنت تنقرا كنت مكحّط الدراهم، بوvري عالمي بكل المقاييس، ريال مايشطح فجيبي، وللأسف مقدرتش نوافق نمشي مع الدراري.
النهار الموعود الدراري فاقو بكري قطعوا من باب دكالة نيشان لكازا فواحد الكار مخرشش، وأنا فهاد الوقيتة اللي هما قاطعين فيها وشادين الطريق كنت أنا مجبدها عليا بواحد مولا نعسة شاااخ شاخ، ماضربتني عمتي الفيقة تال الظوهر، الناس ناضت كاتوضا باش تصلي وأنا نايض تانقلب عل الفطور وقرعة الزيت اللي مودرة تحت الطبلة.

<><>

قَصّيت فطُوري نعماس وهي تجي عندي الواليدة قالت ليا هاك أبيزيز فلوس الطرونسبور، وسير لحg على الدراري صحابك. ومع أن هادا وقت الضوهر وأنا مزال مالبست تا شرويطة والأمسية غاتبدا مع السبعة تالعشية، ومزال عندي الطريق مجبدة لمدينة وحدة وخرااا ماشي هادي. دارت ليا ديك طن فراسي ندي الموطور لكازا ونلحك على العشران، بلا منقطع فالكار ونتلاقا تاني بالكورتيات جيهت الباب، ونسمع لداك الديسك ديالهم المهبول تاع فين غادي؟ أجي ها واحد الكار نقيقي، غا يخرج دابا، ومنين تبعوا يخورك فعشرة دراهم شوقفة، يقوليك خلّصني باش نتغدا !.
أنا خاطني هاد التخاور ، صافي ندي الموتور منها نيت تاني مغامرة وتحدي وإقتصاد شيشوية،
وإلى مشيت فالكار تاني خاصني نشد عرامت الطاكسيات منين نوصل للمدينة، باش غي نمشي للمعهد الفرنسي اللي فيه ديك الأمسية نقدر نخلص فلوس تسافيرة،
وتخيلوا نتوما معايا واحد عرووبي بحالي مفرج فكازا نيgرا فصغرو وهو مرعود، البولة كاتجري فسروالوا، وفينما دار هاك ولا هاك وسمع الإجرام والشفرة كايسمع كازا، تانيا عمرو حط gدمو فهاد الدار الكحلة من قبل كاع، فكيفاش غايكون قالبوا وغايشبعوه تخاور أول مرة إلى دخل ليها.
وبما أني مكحط دورجين وماعندي دراع وغير مضيباني فليسات من عند الوليدة، جاتني فكرة ندي موتوري بلاا منمشي كار. نتحدا المخاوف ديالي من اللخر، وندخل تا انا لهاد المعمعة ديال كازا بقجقالتي، رافعا الرأس و حتا ديلمو القلم.
شديت نعاماسيدي الطريق. جوج إتروا تليصانص واللي عندوا فمو مايتلف، وأرا ليك لخبيط، عفاط عل الكسيراتون وطلق العلوة لمسيو الأدرينالين يشطح مع راساتوا، خوكم صدق ابن بطوطة زمانه على عُودِه السيتسعين البلاستيكية، الكاسكو على رأسه والرِجل على vتاسِه يُفركِعُ السيلاندر شاخط خابطا. ههه، مكاين غير التحرتيك.
شاد الطوالة نعاماسيدي ومخلي ورايا أغاني الخوف وأدياسك تمسكانيت كنشوف غي قدامي،
الموتور مخرج منو داكشي اللي فgلبوا، مكاين غي طحن الكلوميتر أعمي.

<><>

واحد الوقيتة فت بنgرير بطوالة هيا ووقفت نساراح المتور فواحد الخلا خاوية عالطريق، درت البيكي للمتور وجبدت تلفوني نشد سيلفي الرحلة بحالي بحال كاع أمة محمد، وأنا غارق فالسلفيات وحدة من هنا وحدة من لهيه هادي غاتجي هاكا حسن، تاكنسمع خطوات ورايا قاصديني ، تلفت بداكشي اللي فيا وهو يخرج لي واحد خونا ماعرفتوا منين هبط، دري عامر وبحال الى حمري البشرة وهاز شكارة على كتفوا، حوايجوا ماشي تال لهيه، خونا باينة فيه مبيتها فالخلا شي مرة، حالتو حالة، خرجت فيه عيني كي المدفع ويدي مورايا بحال إلى غانجبد مضا من الجيب،
أش داكشي أخونا؟
السيد دهشر بردة الفعل ديالي، واللي خاف! نجا، بقا فبلاصتوا جامد مزادش خَطوَة، قال ليا طريق كازا ؟
جاوبتوا بصوت عالي خشن إلى بيتي كازا هاااهيا ،(شيرت ليه بيدي للطريق ) ، غي دار وأنا نعفط عالموتور حازق بحياتي، كنحاول غي نفهم الديسك منين هبط ومنين بلاصة خرج هاد خونا كانتبلوكا، مافهمت تالعبة، الحمد الله القضية سالمة.
يتبع....
حمزة رزقي نهار مشيت لكازا. قصص مغربية بالدارجة
صورة نهار مشيت لكازا-الدار البيضاء على c90





ااقرأ أيضا : قطّة مغربية بغات تزوج
تعديل المشاركة
author-img

حمزة رزقي

تعليقات
    الاسمبريد إلكترونيرسالة